Proteste Deel 4
Skaduwees
By Sol se paleis
skyn die son
nooit in nie.
Sterligte flikker
teen sy plafon
maar doof nooit
uit nie.
Kristalwater klater
oor sy gemaakte klippe
maar droog nooit
op nie.
Koek-koek kuikens
kakel en snater vir silwer
maar word nooit
sat nie.
In Sol se paleis
heers die nag.
7 Oktober 1996
Sun City
skeiding
Duskant die Swartrivier
in die konsertsaal verskans
met Mozart,
die saal driekwart
vol, sit ons
gedrie, gevier
saamgekoek.
'n Wit kudde,
duskant die swart rivier.
12 julie 1997
tydens die Mozartfees in die Baxter
prokrastinasie
onvoltooide take
oorwoeker my
woning van voorhuis
tot kombuis
briewe half af
of nooit gepos
stories half gedigte
twiste steeds onopgelos
maar een groot taak
voltooi homself
en naas hom
maak niks nog saak.
4 desember 1997
emigrante
ons wou wegkom
uit hierdie land
van hondekak
op bloubergstrand
van korrupsie en geweld
die devaluasie van ons geld
plakkers wat steeds klippe gooi
en rommel in ons strate strooi
'n staat wat fél by elke kans
die aanslag lei op afrikaans
maar hierso in ons nuwe land
kak die honde
ook maar orals op die strand
dinsdag 20 april 1999
|