vuurklip Afrikaans    Peter Blum    Boerneef    Carol Clark    TT Cloete    Clinton V. du Plessis    Louis Esterhuizen    Elisabeth Eybers    Ingrid Jonker    AD Keet    Olga Kirsch    DJ Opperman    SJ Pretorius    Veralda Schmidt    Adam Small

DJ Opperman uit: Heilige Beeste 1945 Voorwinter Ek mis jou losgestorte hare teen my hals in hierdie kwynende seisoen; ek weet vereensaam in die nag alleen hoeveel ek nog vertrouelik wou doen. As strakgespanne palmvingers tril en bome nie meer blad of bloeisel dra, maar alles kaal word en die nagte kil dan brand in my die rooi poinsettia. Eilandgroep Dit is maar enkel waan dat ons 'n eenheid was; groot stromings van die oseaan het ons geëiland tot 'n argipel van enkelinge waar ons briewe rou en skel van strand tot strand soos meeue fladder en van mekaar se eensaamheid vertel. Wild staan die palms bo die water,palms, bamboes en die gras, maar in die onbewuste dieptes êrens ... êrens is ons aan mekaar nog vas. Seesoom Terug gly die watervoue oor die strand en op die kaalte bly die nat klip met sy gleufie sand waarin die seekomkommer groen en blink een oomblik rus voor dit vanaf die wit heup van die strand op wyer golwe van die vreugde sink. Twee stede Onmagtig moes ek met gespanne drade uitgryp oor die skeiding tussen my en jou, gryp met die swart draf van die pale teen heuwels uit, die wit vlug van briewe deur die lug en treine wat deur tonnels fluit. Uiteindelik is ons nouer aan mekaar verbonde, maar tussen my en jou ruis altyd nog riviere, stiltes en afgronde.